Viktor Mendi: “Bu, tibbi personalla aramızda olan sirdi”

“Qəbələ”nin hücumçusu Viktor Mendi “Neftçi” ilə oyundan sonra Futbolxeber.az saytına müsahibə verib.

- “Qəbələ” çempionatda ardıcıl 7-ci qələbəsini qazandı. Kənardan belə görünürdü ki, “Neftçi” ilə oyuna xüsusi motivasiya olmuşdunuz. Bunun səbəbi nə idi?

- Ardıcıl qələbələr qazanmışıq. Bunun davamı da gəlir. “Neftçi”ni də məğlub etdik. Lakin əla oynadığımızı deməzdim. Çünki digər oyunlarla müqayisədə bir qədər zəif çıxış etdik. Səfərdə oynayırdıq, bu səbəbdən də müdafiəyə daha çox diqqət yetirdik, əks-hücumlara bel bağladıq. Bu sistem özünü doğrultdu və yaxaladığımız epizodları da düzgün dəyərləndirdik.

- Bu qələbədən sonra “Neftçi” ilə “Qəbələ” arasındakı xal fərqi 3-ə endi. Artıq “Qəbələ”nin bürünc medallara iddia etdiyini söyləmək olar?

- Biz də bunu istəyirik. Əsas odur ki, qələbələrin ardını gətirək və oyunumuzu da yaxşılaşdıraq. Bunu edə bilsək, bürünc medal özü gələcək.

- İkinci hissədə tez-tez baş verən gərginliyin səbəbi nə idi?

- Meydanda iki güclü komanda qarşılaşırdı. Azərbaycanın ən yaxşılarından birinə qarşı çıxış edirdik. Bizim kimi “Neftçi” də qələbə qazanmaq istəyirdi. Gərginlik də bundan irəli gəlirdi.

- Qısa zamanda komandada hansı dəyişiklik baş verdi ki, “Qəbələ” ardıcıl yeddinci qələbəsini qazandı?

- Hazırda futbolçular arasında anlaşma daha yaxşıdı. Bir-birimizi asan başa düşürük. Qış fasiləsindən sonra isə belə deyildi. Komandanın özünə gəlməsi üçün zamana ehtiyac var idi. Vaxt keçdikcə, daha yaxşı oyun nümayiş etdirəcəyik.

- Qol sevincini özünəməxsus şəkildə qeyd etdin...

- Bu, tibbi personalla aramızda olan sirdi. Sevincimin məmnasını onlar bilir.