Azərbaycanlı futbolçu "Spartak"a qarşı oyunundan danışdı

Əslən azərbaycanlı olan Emin Mahmudov dünən hazırda icarə əsasında çıxış etdiyi "Krılya Sovetov"un əvəzedicilərinin heyətində müqavilə ilə məxsus olduğu "Spartak"a qarşı forma geyib. Futbolxeber.az-ın məlumatına görə, Mahmudov Moskva təmsilçisinə qarşı keçirdikləri oyunu belə şərh edib: "İlk dövrədə çiyin-çiyinə oynadığım futbolçulara qarşı bu dəfə rəqib kimi çıxış etdim. Bu, mənə bir qədər qəribə gəlirdi. Amma konsentrasiya baxımından heç bir problem yox idi. Hər oyunda olduğu kimi, bu dəfə də meydana yalnız qələbə üçün çıxmışdım. Amma biz əlimizə düşən şanslardan yararlana bilmədik. Rəqib isə əksinə, ilk yarıda 2 şans yaxaladı və hər iki epizodu qola çevirdi. Meydana dayaq yarımmüdafiəçisi kimi çıxmışdım. Buna görə də sona kimi mübarizə aparmaq üçün gücüm çatmadı. Aldığım kiçik zədənin də oyunuma təsiri oldu. Sona yaxın əvəzlənməyimi istərdim. Amma əvəzetməmiz də qalmamışdı. Hazırda 80 faiz hazıram. Amma həftənin sonuna kimi 100 faiz hazır olacağam".