Əşrəfoğludan "Neftçi"nin vitse-prezidentinə cavab: “Mənə hər hansı qadağanı klub prezidenti verə bilər”

Dünən “Qəbələ”yə qarşı baş tutan oyundan sonra jurnalistlərlə görüşən “Neftçi”nin vitse-prezidenti Elnur Məmmədov bir sualı cavabsız qoydu. Belə ki, E.Məmmədov “Sizin gəlişinizdən sonra “Neftçi”də prezidentin müşaviri postunu tutan Elnur Əşrəfoğlu kölgəyə çəkilib. Zaqataladakı matçdan sonra o, 10 oyunluq cəzalandı. Həmin vaxt da siz Əşrəfoğlunun tərəfini tutmadınız. Düşünmək olar ki, məhz siz onun kölgəyə çəkilməsinin səbəbkarısız” sualını cavabsız qoymaqla, yalnız “Daim bütün suallarınıza cavab verirəm. Amma icazənizlə bu suala cavab verməyəcəm” söyləməklə kifayətləndi.

Futbolxeber.az saytı məsələ ilə bağlı Elnur Əşrəfoğlunun fikirlərini öyrənib. E.Əşrəfoğlu “Neftçi” ailəsinin bir üzvü olduğunu bildirib: “Mən "Neftçi" klubunda prezidentin müşaviri vəzifəsini icra eləyirəm. Yəni, mənə hər hansı qadağanı klub prezidenti verə bilər. Kimsə danışmamaqla, susmaqla ictimaiyyətədə yanlış fikir formalaşdırmasın. Bu gün Elnur Əşrəfoğlu da "Neftçi" ailəsinin bir üzvüdür. Və ailədən biri ilə hər hansı sual və ya məsələ ortaya çıxarsa, çalışmaq lazımdır onu yaxşılığa doğru həll edəsən. Şəxsən mənə belə öyrədiblər. Mən müstəqil Azərbaycanın ilk futbol çempionatı keçiriləndən bu işin içindəyəm. Heç vaxt da arxa planda olmamışam. Rövnəq Abdullayevə və doğma klubuma sədaqətlə qulluq edirəm. Həmişə də belə olacaq! Biz "Neftçi" məğlub olanda gizlənmirik, sözümüzü deyirik və komandanı hər zaman müdafiə edirik. Qələbələrin şəriki çox olur (gülür)”.