"Mendiyə dedim ki, belə hərəkətə ehtiyac yoxdu”

“Neftçi”nin qapıçısı Aqil Məmmədov Futbolxeber.az saytına müsahibə verib.

- “Qəbələ”ni 3:1 hesabı ilə məğlub etdiyiniz oyun barədə fikirlərin necədir?

- Yaxşı oyun alındı. Düzdür, bizim üçün oyun ağır keçdi. 0:1 hesabı ilə uduzdurduq. Amma oyunun gedişatını dəyişə bildik və 3:1 hesablı qələbə qazandıq. Komanda yoldaşlarımı təbrik edirəm. İndi bu qələbələrin ardını gətirməliyik.

- Havanın dumanlı olması oyunuza təsir etdi?

- Hava şəraiti çox pis idi. Təbii ki, duman da oyunumuza təsir göstərirdi. Müəyyən dərəcədə mane olurdu. Amma alışmalıydıq, başqa variantımız yox idi.

- Duman fasilədən sonra oldu. Demək olar ki, “Neftçi”yə hava şəraitinin əlverişsiz olması düşərli oldu?

- (gülür) Duman tək “Neftçi” tərəfdə yox, “Qəbələ” tərəfdə də var idi.

- İlk yarıda hesabda geridə idiniz. Həmin anlarda komanda nə düşünürdü?

- Hesabda geri düşdükdən sonra biz daha çox hücum edirdik. Rəqib isə daha çox əks-hücumlara üstünlük verirdi. Bir qədər ani hücumlardan narahat idik. Amma sonda hər şey istədiyimiz kimi alındı və oyunun gedişini dəyişə bildik.

- Bəs, Arif Əsədov fasilədə futbolçulara nə dedi?

- Arif müəllim bildirdi ki, itirəcəyimiz bir şey yoxdu. Ona görə də irəli gedin, mütləq qələbə qazanmalıyıq.

- Ardıcıl 2 qələbədən sonra “Neftçi”nin özünə gəldiyini söyləmək olar?

- Fasilədən sonra ilk oyunlar həmişə çətin keçir. Biz də əvvəldə 2 oyunda qələbə qazana bilmədik. Artıq 2 turdur qalib gəlirik. İnanıram ki, bu qələbələrin ardı da gələcək.

- Mendi ilə təkbətək qaldığın epizodu necə şərh edə bilərsən?

- Mən ona toxunmadım. O, simulyasiyaya yol verərək, özünü yerə atdı. Halbuki məni keçdikdən sonra qol vurmaq üçün daha çox şansı olacaqdı.

- Həmin epizodda aranızda dialoq da oldu. Nə danışdınız?

- Ona dedim ki, belə hərəkətə ehtiyac yoxdu.

- “Qəbələ” ilə oyunda “Neftçi”nin formasında rəsmi oyunlarda ilk dəfə qapında qol gördün. Bu barədə fikirlərin necədir?

- Təbii ki, qol buraxmaq yaxşı deyil. Amma bu futboldur. Əsas odur ki, sonda 3 xal qazandıq.