Marko Stanoyeviç: “İndidən Avroliqa haqda düşünmürük”

“Simurq”un futbolçusu Marko Stanoyeviç “Neftçi” ilə oyundan sonra Futbolxeber.az saytına müsahibə verib.

- “Neftçi”yə qarşı keçirdiyiniz oyunda hesab açılmadı. Qarşılaşma haqda neə deyə bilərsən?

- Maraqlı oyun keçdi. Hər iki tərəf qələbə qazanmaq istəyirdi. Ötən tur qalib gəlmişdik. Bu dəfə də meydandan 3 xalla ayrılmaq istəyirdik. Lakin alınmadı.

- Oyun ərzində həm “Neftçi”nin, həm də sizin qol vurmaq üçün şanslarınız oldu.

- Bəli, hər iki tərəfin fərqlənmək şansı oldu. Lakin nə biz bunlardan yararlana bildik, nə də rəqib. Qələbə qazanmaq istəsək də, alınmadı. Əsas odur ki, qalib gələ bilməsək də, uduzmadıq.

- Lazım olan qolu vurmaq üçün “Simurq”da nə çatışmadı?

- Ciddi bir səbəb göstərmək çətindi. Dediyim kimi, meydana yalnız qələbə üçün çıxmışdıq. Ötən turdakı uğuru yenə təkrarlamaq istəyirdik. Bu halda turnir cədvəlindəki mövqeyimizi daha yaxşılaşdıracağdıq. Amma alınmadı.

- Belə çıxır ki, “Simurq” üçün qələbədən daha çox məğlub olmamaq vacib idi?

- Belə deməzdim. Biz hər oyuna 3 xal üçün çıxırıq. Amma hərdən elə olur ki, hücumda istədiyinə nail ola bilmirsən. Bu halda meydanı xalsız tərk etməkdənsə, 1 xal daha yaxşıdır.

- “Simurq” hazırda dördüncü pillədə qərarlaşıb. Həmin mövqeyə AZAL, “Qəbələ” və “Xəzər Lənkəran” da can atır. “Simurq” sona kimi mövqeyini qoruya biləcək?

- Bu mövsüm Avroliqaya yollanmağı hədəfləyirik. Məqsədimiz ən azı dördüncü yeri tutub, avrokuboklara yollanmaqdı. Lakin indidən Avroliqa barədə düşünmürük. Hər dəfə növbəti oyunu fikirləşirik. Bu gün “Neftçi” ilə oynadıq və meydandan 1 xalla ayrıldıq. Artıq bu oyun keçmişdə qaldı və sabahdan növbəti matçı düşünəcəyik. 1 qələbədən sonra gələcək barədə düşünsək, bu, ziyanımıza işləyə bilər.