Adrian Ropotan: “Problem müdafiədə yox, bütün “Qəbələ”dədir”

“Bu oyuna qələbə qazanmaq üçün çıxmışdıq. Lakin çox zəif oynadıq və uduzduq”. Futbolxeber.az saytına verdiyi açıqlamada bu sözləri “Qəbələ”nin yarımmüdafiəçisi Adrian Ropotan deyib.

“Xəzər Lənkəran”a böyükhesabla uduzduqları oyun (0:3) barədə danışan rumın futbolçu, artıq növbəti görüşlərini düşünməli olduqlarını vurğulayıb: “Məğlubiyyətin ciddi səbəbi yoxdur. Zəif oynadığımızdan uduzduq. Məşqlərdə səhvlərimiz üzərində çalışmalıyıq. Artıq bu yenilgini də unutmalıyıq. İndi bütün diqqətimizi növbəti oyunlara yönəltməliyik. Heç kim istəməz ki, uduzsun. Biz də qələbə qazanmaq istəyirdik. Lakin alınmadı”.

Hakimə sərt şəkildə etiraz etdiyinə görə cəzalanan Ropotan ədalət qoruyucuları haqda çox danışmaq istəməyib: “Meydanda əsas söz sahibi hakimdir. O, nə istəyir, onu da edir. Bu haqda başqa nəsə deyə bilmərəm”.

“Qəbələ”nin aparıcı üzvü komandasının ən zəif yerinin müdafiə xətti olması fikri ilə razılaşmayıb: “Xeyr, problem müdafiədə yox, bütün komandadadır. Yenilgiyə görə kimisə günahlandırmaq olmaz. Hamı çalışır və əlindən gələni edir ki, komandasına faydalı olsun”.