Ölkə kubokunu ya “Bakı” qazanacaq, ya da “Qarabağ”!

Azərbaycan kubokunun 1/4 finalında “Bakı” “Qarabağ”la üz-üzə gələcək. Futbolxeber.az-ın araşdırmasına görə, bu komandaların kubokdakı mübarizəsində maraqlı məqam diqqət çəkir. Belə ki, paytaxt klubu “Bakı” adı ilə mübarizəyə başladığı 2004/2005 mövsümündən etibarən bu 2 komanda kubokda üz-üzə gəldiyi zaman, sonda turnirin qalibi də məhz bu iki kollektivdən biri olur.

İlk belə hal 2005-2006 mövsümündə yaşanıb. Həmin vaxt “Bakı” və “Qarabağ” 1/4 finalda üz-üzə gəliblər. İki oyunun nəticəsinə görə 3:2 hesabı ilə qalib gələn “Qarabağ” sonda kuboku başı üzərinə qaldırıb.

2008-2009 mövsümündə “Bakı” və “Qarabağ” yarımfinalda qarşılaşıblar. Hər iki matçda 2:1 hesablı qələbəyə sevinən “Qarabağ” finalda da qalib gəlib.

2011-2012 mövsümündə də tərəflər finalın bir addımlığında qarşılaşıblar. Hər iki komanda səfərdə 1:0 hesablı qələbəyə sevindiyindən qalibi penaltilər seriyası aşkarlayıb. Burada dəqiqə oynayan “Bakı” (5:4) finala vəsiqə qazanıb. Həlledici oyunda “Neftçi”ni 2:0 hesabı ilə üstələyən “Bakı”, tarixində üçüncü dəfə kuboku başı üzərinə qaldırıb. Göründüyü kimi, buna kimi “Qarabağ” və “Bakı” 3 dəfə kubokda qarşılaşıblar və həmin mövsümlərdə kubokunun qalibi bu iki komandadan biri olub.