Icraiyyə Komitəsinin üzvü: “Prosineçkinin böyük ambisiyaları var”

“Milli komandaya belə vəziyyətdə 6 oyunluq baş məşqçi gətirmək doğru olmazdı. AFFA prezidenti də yeni çalışdırıcı ilə uzunmüddətli müqavilə istəyirdi. İlk növbədə cari seçmə mərhələni daha layiqli şəkildə tamamlamaq istəyirik. Yəqin ki, əsas məqsəd 2018-ci il dünya çempionatı ilə bağlı olacaq”. Futbolxeber.az saytına verdiyi açıqlamada bu sözləri AFFA İcraiyyə Komitəsinin üzvü Mahir Məmmədov deyib.

M.Məmmədov Prosineçkinin seçmələrinin səbəbini belə izah edib: “O, Azərbaycan futbolunu son vaxtlar dərindən izləyib, analiz edib və görüşə də hazırlıqlı gəlib. Onun böyük ambisiyaları var. Prosineçki zəngin futbolçu karyerasına malik simadı. Artıq məşqçilik karyerasında da müəyyən uğurları var. Uzun müddət Xorvatiya yığmasında Slaven Biliçlə çalışıb. Ən əsası, Bakıda yaşamaq istəyir, ailəsini də bura gətirəcək, övladı burada təhsil alacaq. Biz özümüz də onun futbolçu və məşqçi karyerasını yaxından araşdırmışdıq. Görüş zamanı da çıxışları ilə bizi inandırdı”.