Flavinyo: “Hər dəfə deyirsiniz ki, əvvəlki kimi oynamıram”

“Qəbələ”yə qarşı yaxşı oynamadıq. Birinci hissədə çox passiv idik. Bunun səbəbini bilmirəm. Bəlkə də yorğunluqdan irəli gəlirdi. İkinci hissədə fəallaşsaq da, lazımı qolu vura bilmədik”. Futbolxeber.az saytına verdiyi açıqlamada bu sözləri “Neftçi”nin kapitanı Flavinyo deyib.

Braziliyalı futbolçu cari mövsümdə inamsız təsir bağışlamasının səbəbini açıqlayıb: “Hər dəfə deyirsiniz ki, əvvəlki kimi oynamıram. Heç bir futbolçu əvvəlki kimi oynamır. Razıyam, bu gün əvvəlki oyunlarımdan əsər-əlamət yox idi. Bura gələndə 26, indi isə 31 yaşım var. Buna baxmayaraq, “Neftçi”yə hələ də kömək edə biləcəyimə inanıram. Yeni gələn vaxtdakı kimi oynaya bilmirəm. Bu gün elə oyunçular var ki, məndən daha yaxşıdırlar. Bu gün tək mən yox, komandanın bütün üzvləri yaxşı oynamalıdır”.

Flavinyo növbəti turda üz-üz gələcəkləri “Qarabağ”la matç haqda da fikirlərini açıqlayıb: “5 ildir “Neftçi”dəyəm. İndiyə qədər “Qarabağ”ı daha çox məğlub etmişik, nəinki uduzmuşuq. Rəqibimizə hörmətimiz var. Ancaq artıq risq etməliyik. “Qarabağ” bizdən bir neçə xal artıq toplayıb. Amma çalışmalıyıq ki, qələbə sayəsində bu fərqi aradan qaldıraq”.