Çixradze: “Hücumda yox, müdafiədə çox səhvlərimiz oldu”

“Hər iki komanda xeyli qol vəziyyəti yaratdı. Bu gün güclü komanda ilə oynayırdıq”. Futbolxeber.az-ın məlumatına görə, bu sözləri “Qarabağ”la oyundan sonra “Simurq”un baş məşqçisi Georgi Çixradze deyib.

Gürcü mütəxəssis əvəzetmədən az istifadə etməsinin səbəbini açıqlayıb: “Qalib gəlmək istəyirdik. Komandam ilk qolu vursa da, sonradan qapısından 3 top buraxdı. Yaratdığımız qol vəziyyətlərdən yalnız 2-dən yararlana bildik. Əvəzetmə ona görə az etdik ki, hücumameyilli futbolçularımız yox idi. Üstəlik, limit məsələsi var. Polyakı meydana buraxa bilərdim. Amma onun mövqeyində oynayan Stanoyeviç çox yaxşı çıxış edirdi. Hücumda yox, müdafiədə çox səhvlərimiz oldu. Emeqara asanlıqla müdafiə xəttimizi keçirdi. Rəşad Eyyubovun oyununda sabitliyin çatışmadığını deyə bilmərəm. O müəyyən orta səviyyəyə çatıb”.