Qara Qarayev: “Foqtsun dövründəki komandadan əsər-əlamət yox idi” (Müsahibə)

Milli komandamızın üzvü Qara Qarayev Futbolxeber.az saytına müsahibə verib.

- Milli komandamız Avro-2016-nın seçmə mərhələ oyununda Norveçə 0:1 hesabı ilə uduzdu. Qarşılaşma haqda nə deyə bilərsən?

- Oyuna yaxşı hazırlaşmışdıq. Məqsədimiz qələbə qazanmaq idi. Millidə baş məşqçi dəyişikliyi oldu. Bu dəfə özümüzü göstərmək, meydandan 3 xalla ayrılmaq istəyirdik. Lakin alınmadı. Buna görə çox təəssüflənirəm. İndi növbəti oyunlara hazırlaşmalıyıq.

- Məğlubiyyətin səbəbini nədə görürsən?

- Ciddi bir səbəb yoxdur. Rəqib bizdən üstün deyildi. Sadəcə olaraq, ani diqqətsizlik etdik və nəticədə də qapımızda qol gördük.

- Əsas heyətdən kənarda qalmağın sənə təəccüblü gəlmədi?

- Bu haqda nəsə deməyim düzgün olmaz. Qərarı baş məşqçi qəbul edir. Mən də onun qərarına hörmətlə yanaşıram.

 - Meydana start heyətində çıxsaydın nə dəyişəcəkdi?

- Bütün oyun meydanda olaydım, bu, özümə faydalı olardı. Amma heç kim təminat verə bilməz ki, mən start heyətində yer alsaydım qələbə qazanacağdıq.  

- Oyunun sonlarına yaxın aqressiv təsir bağışlayırdın. Bunun səbəbi nə idi?

- Meydana ikinci hissədə daxil olmuşdum. Komanda yoldaşlarımı ruhlandırmağa çalışırdım. Hesabda geridə idik. Çalışırdım ki, komandanı motivasiya edim, qol vuraq. Təəssüf ki, alınmadı.

- Foqtsun çalışdırdığı milli ilə indiki komandanı müqayisə etsək, hansı fərq ortaya çıxar?

- Norveçə qarşı oynayan yeni komandaydı. Əvvəlki komandadan əsər-əlamət yox idi. Foqtsun çalışdırdığı komandaya baxanda, bu dəfə meydanda fərqli nüanslar var idi. Komanda daha çox hərəkətdə idi. Amma geniş müqayisə aparmaq istəmirəm.

- Komandanın bu dəfə fərqli oynamasını Mahmud Qurbanov amili ilə əlaqələndirmək olar?

- Əlbəttə. Mahmud bəyi hamımız yaxşı tanıyırıq. Anlaşma baxımından heç bir problem yox idi. Hər kəs eyni dildə danışırdı.

- Millinin baş məşqçi məsələsi hələ də açıq qalır...

- Bu haqda nəsə deyə bilmərəm, Kim gəlir, gəlsin. Fərq etməz. Biz başımızı aşağı salıb, öz işimizi görməliyik.