“Bakı”nın gənc futbolçusu: “Ürəyimə dammışdı ki...”

“Hamımız üçün çətin oyun oldu. Həftə ərzində bu oyuna ciddi hazırlaşmışdıq”. Futbolxeber.az-ın məlumatına görə, bu sözləri “Bakı”nın rəsmi saytına verdiyi açıqlamada Mahir Mədətov deyib.

“Araz Naxçıvan”la matçda Azərbaycan Premyer Liqasında debüt edən Mədətov, hələ oyundan əvvəl meydana çıxacağını hiss etdiyini vurğulayıb: “Oyuna bir neçə gün qalmış ürəyimə dammışdı ki, bu matçda meydana çıxacam. Hətta oyunda vəziyyət yaxşı olmayanda meydana daxil olacağımı hiss etmişdim. Elə də oldu. Bir qol buraxmışdıq. Belə vəziyyətdə məşqçi mənə şans verdi. Demirəm ki, oyunu dəyişə biləcək fövqəladə bir oyun göstərdim, ümumilikdə ilk oyunumun uğurlu alındığı qənaətindəyəm. Futbolu öyrəndiyim klubun əsas komandasında oyuna çıxdığım üçün sevincliyəm”.