Tsxadadze: “İnanıram ki, tezliklə “İnter” də Avroliqanın qrup mərhələsinə düşəcək” (Müsahibə)

“İnter”in baş məşqçisi Kaxaber Tsxadadze Futbolxeber.az saytına müsahibə verib.

- “İnter” 10 illik yubileyini qeyd etdi. Siz də artıq 5 ildir ki, klubda çalışırsız. İlk öncə elə yubiley haqda təəssüratlarınızı bilmək istərdik. Klubda keçirdiyiniz illər barədə nə deyə bilərsiz?

- İlk növbədə klubda çalışan hər kəsi təbrik edirəm. Başda klubun təsisçisi Cahangir Hacıyevi. Minnətdaram ki, bu gün hər birimizə öz gücümüzü göstərmək şansı yaradır. Daha sonra futbolçulara minnətdaram. Mən hər zaman demişəm ki, rəhbərlikdən sonra uğurda ən çox payı olan futbolçulardı. Qazandığımız bütün uğurlarda onların boyuk rolu var. 2004-cü ildən bu yana klubda əziyyəti olan hər kəsə təşəkkür edirəm. Özümə gəldikdə, burada 5 il keçirmişəm və bu, heç də az müddət deyil. Rəhbərlik sağ olsun ki, mənə dəstək olur, güvənir. 5 ildə heç də pis nəticələrə imza atmamışıq. Ölkə daxilində kubokdan başqa, bütün mükafatları qazanmışıq. Yeganə mənfi hal avrokuboklarda istədiyimiz nəticəyə nail ola bilməməyimizdir. Yenə də iddiamız var. İnanıram ki, tezliklə “İnter” də Avroliqanın qrup mərhələsinə düşəcək.

- Klubda keçirdiyiniz 5 il ərzində ən uğurlu və uğursuz anlar hansılardı?

- İlk öncə onu deyim ki, hər zaman uğur qazanmaq mümkün deyil. Suala gəldikdə isə, ötən mövsümün əvvəlində ilk 6 oyundan 5-ini uduzmuşduq. Bunu ən uğursuz anlardan biri hesab edirəm. Xoş məqamlar isə daha çoxdur. İlk ilimdə çempion olduq. Daha sonra “Birlik Kuboku”nu qazandıq. 2 dəfə bürünc, 1 dəfə gümüş medala sahib çıxmışıq. 3 dəfə penaltilərdə uduzmağımızı xatırlamaq da xoş deyil. Amma futbolda uduzmaq da olur. Digər tərəfdən də uduzduqdan sonra iş daha çox olur.

- Digər klubda oyunu alınmayan, ideal formadan uzaq olan futbolçular “İnter”ə gəlib parlayırlar. Belə nümunələr çoxdur. Buna necə nail olursunuz? Sirr nədədir?

- Bunun heç bir sirri yoxdur. Hər məşqçi çalışır ki, rəhbərliyi altındakı futbolçunun müsbət cəhətlərini tapsın.

- Amma siz həmin müsbət cəhəti olmayan yerdən tapırsız...

- Yox, belə deyil. Hər insanın müsbət cəhəti də var, mənfi də. Hər futbolçu da üstün cəhətlərə malikdir. İlk növbədə mən futbolçuya fərdi şəkildə yanaşıram. Bu, çox vacibdir. Üstəlik, bunu tək mənim yox, məşqçilər korpusunun adı ilə bağlamaq lazımdır. Çox yaxşı korpusumuz var.

- Adətən komandadan gedənləri geri qaytarmırsız. Məsələn, Levinin qayıtmasını istəməmişdiniz. Amma Asif Məmmədov, Nizami Hacıyev və Elvin Məmmədov kimi futbolçuları yenidən komandaya qaytarmısız. Hansı səbəbdən bu futbolçulara yenidən şans vermisiz?

- “Levinin qayıtmasını istəmirəm” deməyimi xatırlamıram. Çünki belə bir ehtimal olmayıb. O ki qaldı geri qayıdan futbolçulara, Asifi hələ “Standart”dan tanıyıram. Ümumi fikrim belədir ki, insan həyatda səhv edibsə, ona yenidən şans vermək lazımdı. Eyni sözləri digərləri haqda da demək olar. Hər biri istedadlı futbolçulardı. Üstəlik, ürəkləri təmizdi. Mən insanda bu məqama çox böyük diqqət yetirirəm. Həm də əsas olan mənim nə düşündüyüm yox, klubun marağıdı. Futbolçularıma da izah etmişəm ki, daim klubun marağını üstün tutsunlar. Çünki klub qazansa, bundan hər birimiz fayda götürəcəyik.

- Elə futbolçu var ki xarakteri ürəyinizcə olmasa da, kluba faydalıdır deyə bu gün komandadadır?

- Yox, beləsi yoxdur.

- Zədəli futbolçularım durumu nə yerdədir?

- Elvin Məmmədovun vəziyyəti günü-gündən yaxşılaşır. “Tiraspol”la oyunda sıradan çıxmışdı və həmin vaxtla müqayisədə 60 faiz yaxşı durumdadır. Sezar Meza Kolliyə vaxt lazımdı. Ən azı ayyarım. Hazırda fərdi şəkildə çalışır. Yəqin ki, yeni ilə kimi xidmətindən yararlana bilməyəcəyik. Mirzağa  Hüseynpurun durumu isə qeyri-müəyyəndir. Hazırda çalışırıq ki, əməliyyata ehtiyac olmasın. Amma alınmasa, əməliyyat olunacaq.

- Hüseynpur komanda ilə birgə Gürcüstana yollanacaq?

- Hə, yollanacaq.

- Son olaraq Junior Nildonu transfer etdiniz. Bununla heyət tam komplektləşib, yoxsa qışda daha 1-2 futbolçu ilə güclənməyiniz mümkündür?

- Ola bilər ki, 1-2 mövqedə dəyişiklik olsun. Hansısa mövqedə axsama görsək, çalışacağıq dəyişiklik edək. Amma bu, işin gedişində bilinəcək. İndidən bu haqda nəsə demək çətindir.

- Tərzin Cahangirovla maraqlandığınız doğrudur?

- Yox.  

- Bəzən heyətə cəlb etdiyiniz futbolçular “İnter”də parladıqdan və ya rəhbərliyiniz altında yenidən ideal formaya düşdükdən sonra digər klubdan gələn daha sərfəli təklif qəbul edərək “İnter”dən ayrılırlar. Belə halda çoxmu təəssüflənirsiniz?

- Ümumiyyətlə, hansı səbəbdən olur-olsun futbolçu komandadan gedəndə məyus oluram. Xüsusən də ilk başda. Amma zaman keçdikcə fərqli düşünürəm. Özümü onun yerinə qoyub, addığı atdımı başa düşürəm. İstənilən halda, həmin futbolçulara da minnətdaram.

- Onlar da sizə minnətdar olmalıdırlar.

- Yox, mən belə düşünmürəm.

- Axı, siz olmasaydınız onlar indiki səviyyəyə çata bilməyəcəkdilər?

- Məsələyə fərqli yanaşaq. Onlar da olmasaydı, biz keçən il qazandığımız nəticəni qazana bilməzdik. Yəni, hər iki tərəfin zəhməti olub.

- Fasilə müddətində “İnter” Gürcüstana yollanacaq. İstərdik hazırlıq prosesi barədə də məlumat verəsiniz.

- Ayın 2-də komanda toplanır, 3-ü artıq Tiflisdə məşqlərə başlayırıq. İlk öncə taktiki cəhətdən hazırlıq keçəcəyik. Daha sonra isə yoxlama oyunlarında gücümüzü sınayacağıq.

- Neçə oyun olacaq?

- 3 oyun keçirməyi planlaşdırırıq. Ayın 7-si, 9-u və 10-da.  

- Rəqiblərin adları bəllidir?

- İlk rəqibin adı bilinmir. Ayın 9-u və 10-da isə “Sioni” və “Samtredia” ilə qarşılaşmağımız nəzərdə tutulub. Amma “Kasımpaşa” ilə də görüşə bilərik. Bu günlərdə Şota Arveladze mənə zəng vurmuşdu. Həmin müddətdə görüşə biləcəyimizi dedi. Əgər, onlarla qarşılaşası olsaq, adını çəkdiyim 2 komandadan biri ilə oyun keçirilməyəcək.

- Yəqin ki, ayın 9-u və 10-da keçirəcəyiniz oyunlarda fərqli heyətlə mübarizə aparacaqsınız?

- Təbii ki.