Rauf Əliyev: “Foqts o açıqlamanı səbəbsiz verməyib”

“Bolqarıstana məğlubiyyətin səbəbləri barədə nə deyim? Standart vəziyyətlər daim bizim üçün problem olub. Avropalılarla oynayanda bu problem özünü daha qabarıq şəkildə göstərir. Bu dəfə də belə oldu”. Futbolxeber.az saytına verdiyi açıqlamada bu sözləri milli komandamızın hücumçusu Rauf Əliyev deyib.

R.Əliyev millimizin Bolqarıstanla oyunda məğlubiyyətə layiq olmadığını bildirib: “İkinci qolda kobud səhvlə yadda qaldıq. Ona görə də uduzduq. Halbuki məğlubiyyətə layiq deyildik. Ən azından heç-heçə oynamalıydıq. Bizim kimi bolqarlar da play-off uğrunda mübarizə aparırlar. Üçüncülük mübarizəsində əsas rəqiblərimizdən biri idi. Onlara məğlubiyyət heç yerinə düşmədi”.

“Xəzər Lənkəran”lı forvard bu yenilgidən sonra millimizin qrupda üçüncü olmaq şansının azalmadığını düşünür: “Düzdür, məğlubiyyət heç də yerinə düşmədi. Qarşıda hələ xeyli oyun var. Odur ki, biz ümidimizi itirmirik. Qarşıya qoyulan hədəfə çatmaq üçün sona kimi əlimizdən gələni edəcəyik”.

“Foqts, Bolqarıstanla oyundan sonra belə bir fikir səsləndirmişdi ki, bu matçda itirdiyimiz xalları qarşıdakı səfər görüşlərində bərpa etməyə çalışacağıq. Səncə, öz meydanında Bolqarıstana uduzan komandanın İtaliya və Xorvatiyadan səfərdə xal alması realdırmı” sualını Rauf Əliyev delə cavablandırıb: “Foqts o sözləri səbəbsiz deməyib. O, ötən tsikldə səfərdə sərgilədiyimiz oyunlara əsasən belə düşünür. DÇ-2014-ün seçmə mərhələsində səfərdə İsraildən xal aldıq. Rusiya ilə görüşdə sona yaxın heç nədən uduzduq. İnanıram ki, qarşıdakı oyunlardan ən azı birindən xal alacağıq”.