Rahid Əmirquliyev: “Nəticə oyuna görə olmadı”

“Əvvəldən də oyunun çətin keçəcəyini bilirdik. Belə də oldu. Amma pis oynamadıq. Xeyli qol epizodu yaratsaq da, onları boşa verdik. Nəticə oyuna görə olmadı”. Futbolxeber.az saytına verdiyi açıqlamada bu sözləri “Xəzər Lənkəran”ın kapitanı Rahid Əmirquliyev deyib.

“Neftçi” ilə oyun haqda danışan təcrübəli yarımmüdafiəçi oyunun gedişində Flavinyo ilə mübahisə etməsinə də aydınlıq gətirib: “Penaltini qaçırmağımızın da yenilgidə böyük rolu oldu. Halbuki həmin epizodda fərqlənsəydik, görüşün nəticəsi tam fərqli olacaqdı. “İnter”in ardınca “Neftçi”ni də məğlub etmək istəyirdik. Bunun üçün şansımız da vardı. Amma “vuran ayağ”ın olmaması öz sözünü dedi. Flavinyo ilə mübahisəyə gəldikdə, o, yıxılanda topla məni vurdu. Amma hakimin mənə niyə sarı vərəqə verdiyini anlamadım. Axı, mən Flavinyonu nə söydüm, nə də təhqir etdim”.