29 Mart 2024, Cümə
Ağabala Ramazanov qayıtdı - FOTO
"Zirə"dən ardıcıl 15-ci qələbə
“Səbail”in hücumçusu: 1 qol, 2 qələbə
U-21 millimiz Ukraynaya da uduzdu

Ölkə futbolu

Tərlan Əhmədov: “İnanıram ki, biz “Qarabağ”ı, onlar da “Sent Etyen”i məğlub edəcək”

“FOQTS ÇIXIB, ONLARIN YERİNƏ OYNAMAYACAQ Kİ”

AZAL-ın baş məşqçisi Tərlan Əhmədov Futbolxeber.az saytına müsahibə verib.

- Çempionatda yaranan fasilədən AZAL necə yararlanır?

- “Qəbələ” ilə oyundan sonra komandaya 2 günlük istirahət verdik. Daha sonra məşqləri bərpa etdik. Dünən əvəzedicilərlə yoxlama oyunu keçirdik. Sabahdan isə “Qarabağ”nan oyunun hazırlığına start verəcəyik. 6 günlük tsiklnən bu oyuna hazırlaşacağıq.

- Heyətdə hər hansı itki varmı?

- Yalnız Tomi Kostadinov zədəlidi. O, “Qarabağ”la oyunda meydana çıxa bilməyəcək. Həmin qarşılaşmadan sonra məşqlərə başlayacaq.

- Bayaq əvəzedici heyətlə qarşılaşdığınızı xatırlatdınız. Niyə məhz rəqib qismində digər klubu yox, əvəzediciləri seçdiniz?

- Onsuz da mövsüm ərzində eyni komandaynan 4 dəfə oynayırıq. Bu sayın 5-ə çatmasını istəmədim. Bu halda bəzi nüanslar ortaya çıxa bilər. Əslində, mən birinci divizion klublarından biri ilə qarşılaşmağımızı istəyirdim. Amma birinci liqada da mövsüm start götürdüyündən istəyim baş tutmadı. Əvəzedicilərlə bu səbəbdən qarşılaşdıq. Digər tərəfdən də əvəzedici heyətdə 1994, 1995-ci il təvəllüdülü bacarıqlı uşaqlar var. Onların da oyununa tamaşa etmək istəyirdim. Bəziləri artıq əsas komandayla məşqlərə başlayıblar.

- Bir çox məşqçilər çempionatda yaranan fasilədən narazıdır. Siz də fikirdəsiniz?

- Bilirsiz, biz hamımız milli komandaya görə çalışırıq. Nə istəməyimizdən asılı olmayaraq, məqsədimiz yığmaya fayda verməkdir. Bu toplanışlar komandaya fayda verəcəksə, mən bunda problem görmürəm. Yığmanın uzunmüddətli toplanışları futbolçulara xeyirdir. Bu halda futbolçuların anlaşması yüksəlir. Yenə deyirəm, bu toplanışlardan milliyə xeyir dəyirsə, fasilə yaranmasına qarşı deyiləm.

- Amma hələ ki bu toplanışların yığmaya ciddi xeyrinin dəymədiyini görürük. Ən azından Rusiya ilə oyunda komandamız rəqibinə müqavimətsiz uduzdu...

- Nə olursa olsun, bu gün birdən-birə nəticə qazanmaq mümkün deyil. Əvvəllər şəraitsizlikdən, yoxlama oyunlarının azlığından şikayələtnirdik. İndi isə beynəlxalq oyunların sayı artıb. Bu cür toplanışların komandaya faydası dəyir. Amma rəsmi oyunla, qeyri-rəsmi görüş tam fərqli anlayışlardı. Yoxlama oyunundakı məğlubiyyətə görə nəticə çıxarmaq düzdün deyil. Ola bilər ki, futbolçularımız Rusiya ilə oyuna tam köklənməmişdilər. Əminəm ki, ayın 9-da tam başqa oyuna şahid olacağıq.

- Millimiz Bolqarıstanı məğlub edə biləcək?

- Niyə də yox? Bu gün futbolumuzda inkişaf var. “Qarabağ”ın Avroliqanın qrup mərhələsində oynaması buna sübutdur. “Neftçi” də eyni uğuru təkrarlaya bilərdi. Lakin bir qədər bəxtsizlik oldu. İnanıram ki, onlar gələn mövsüm qarşıya qoyulan hədəfə çatacaqlar. Son 3 ildə klublarımızın 2 dəfə qrup mərhələsində oynaması, “Qarabağ”ın demək olar ki hər mövsmü play-offa kimi irəliləməsi futbolumuzun inkişafının göstəricisidir. İnanıram ki, milli komandamız da klublarımız kimi bizi sevindirəcək.

- İstər Berti Foqts, istərsə də AFFA rəhbərliyi bəyan ediblər ki, Avro-2016-nın seçmə mərhələsində milli komandamızın məqsədi qrupda minimum üçüncü yeri tutmaqdır. Sizcə, millimizin bu nəticəyə imza atması realdır?

- Azərbaycan futbolunun potensialı bu nəticəni qazanmağa imkan verir. Futbolumuz günü-gündən inkişaf edir. Keçən tsiklin son oyunlarında millimizin qazandığı nəticələr də ümid etməyə əsas verir. Futbolçular dərk etməlidirlər ki, klubdakı nəticəni millimiz də təkrarlamalıdır. Foqts çıxıb, onların yerinə oynamayacaq ki. AFFA tərəfindən də bu gün milliyə hər cür şərait yaradılıb.

- Yenidən AZAL-a qayıdaq. Növbəti turda komandanız “Qarabağ”la qarşılaşacaq. Bu oyunda AZAL ardıcıl ikinci qələbəsini qazana biləcək?

- Hər şey Allahın əlindədi. Bilirik ki, rəqib güclüdür. “Qarabağ”ın Avroliqaya vəsiqə qazanması bu komandanın gücündən xəbər verir. Odur ki bizi qarşıdakı çox ağır oyun gözləyir. Çempionat elədi ki, komanda bir qələbə qazanırsa, bunun ardını gətirmək istəyirik. Düzdür, bir qədər vaxta ehtiyacımız var. Futbolçular hələ də tam olaraq bir-birinə uyğunlaşmayıblar. Buna baxmayaraq, çalışacağıq ki Qəbələdəki qələbənin ardını gətirək. İnanıram ki, biz “Qarabağ”a, onlar da “Sent-Etyen”ə qalib gələcəklər.

- Keçən dəfə sizinlə danışanda qeyd etmişdiniz ki, AZAL-ın cari mövsümdəki hədəfi ilk “beşliy”ə düşüb, Avroliqaya vəsiqə qazanmaqdı. İndi çempionat da başlayıb, rəqiblərin də çıxışına bələd olmusuz. Necə düşünürsüz, AZAL istəyinə çata biləcək?

- Komandamızda oyundan oyuna irəliləyiş hiss olunur. Qəbələdə futbolçular əzmkarlıq nümayiş etdirərək, sona kimi mübarizə apardılar. Bu isə bizə gələcəyə nikbin baxmağa əsas verir. İstədiyimiz nəticəni qazansaq, qış fasiləsində daha 1-2 oyunçuyla güclənəcəyik. İnanıram ki, AZAL istəyinə çatacaq. Məşqdən məşqə, oyundan oyuna komandada inkişaf var. Mövsüm uzundu, qələbə də olacaq, məğlubiyyət də. Amma bir oyunumuz əksikdi, 3 turdan sonra da aktivimizdə 4 xal var. Komandanın potensialı daha yaxşı nəticə haqda düşünməyə əsas verir.

 




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Mart 2024
B.eÇ.aÇC.aCŞB
01 02 03
04 05 06 07 08 09 10
11 12 13 14 15 16 17
18 19 20 21 22 23 24
25 26 27 28 29 30 31