Arzun çin olsun, Berti Foqts!..

Bu gün milli komandamız növbəti oyununa çıxacaq. Rəqib Özbəkistandı, adi yoxlama oyunudu, millimiz meydana optimal olmayan heyətlə çıxacaq, qələbə qazanmağı çox istəyirik... Ən azından qələbə hər zaman qələbədi. İstər özbəklər üzərində olsun, istər braziliyalılar. Bütün bunlar öz yerində. Sözümün canı başqadı.

Dünən millinin baş məşqçisi Berti Foqts mətbuat konfransı keçirdi. Son bir neçə ildə alman mütəxəssisin jurnalistlərlə görüşlərində iştirak etmədiyim üçün onu yenidən canlı “dinləmək” maraqlıydı.

Mətbuat konfransından sonra əmin oldum ki, geridə qalan illər ərzində dəyişən çox şey yoxdu. Foqts yenə də aradabir atmacaları ilə mətbuat nümayəndələrini “sancırdı”. Ən azından əcnəbi futbolçuların milliləşdirilməsi ilə bağlı suala cavab verərkən əlini qulağına tutaraq, “Blatterə zəng vurun, bəlkə xahişinizi nəzərə alar” deməsi, belə düşünməyə əsas verir. Alman bəzi mətbuat nümayəndələrinə aşağıdan yuxarı baxır. Təbii ki, onun da özünə görə arqumentləri var. Bəzən mənasız suallar eşidir və buna görə qurunun oduna yaş da yanır. Vəziyyət o həddə çatıb ki, Mikayıl Nərimanoğlu mətbuat konfransı başlamamışdan öncə KİV nümayəndələrindən məntiqli suallar verməyi rica edir.

Dünən özlüyümdə yeni Foqts kəşf etdim. Bu “kəşf” mənə bəzi şeyləri anlamağa yardım etdi. Artıq əminliklə bilirəm ki, Diniyevin və ya bir başqasının vaxtında “at oynadanlar” nəyə görə almanın qarşısında “sakit uşağ”a çevrilirlər.  

Foqts ağına-bozuna baxmadan “Qarabağ” və “Neftçi”yə “döşədi”. Düz də elədi. Superkubok oyununun təxirə salınması həqiqətən də absurd qərar idi. Bu gün bir-biriləri ilə üz-üzə gəlməkdən “yorğunluq” bəhanəsi ilə imtina edən “Neftçi” və “Qarabağ”ın futbolçuları sabah 4 gün ərzində Xorvatiya və İtaliya qarşısında necə duruş gətirəcəklər? Belə çıxır ki, Foqts hər iki oyuna fərqli heyət buraxmalıdı? O anda, “təsəvvür edin ki, hər iki klub Avroliqanın qrup mərhələsinə yüksəlsə, necə olacaq” demək istəsəm də, susdum...

Əsl “bomba”nı Foqts, sonda partlatdı. “AVRO-2016-nın seçmə mərhələsində hansı nəticə sizin üçün uğurlu, hansı isə uğursuz olacaq” sualın(m)a alman məşqçi “play-offa vəsiqə qazanmaqdan başqa heç bir nəticə məni qane edə bilməz” deyərək, cavab verdi. Bu, tanıdığım(ız) Foqts deyildi. Taktikası kimi özünün də qorxaq olduğunu zənn etdiyim alman, bir anda gözümdə şirə döndü. Foqts buna qədər əksər hallarda ehtiyatlı danışır, hətta “cırtdan”larla oyunlardan əvvəl belə, qələbə vəd etmirdi. İndi isə play-offdan dəm vurur. Deyir, “avazın yaxşıdı, oxuduğun Quran olsa”. Nə deyirik, cənab Foqts. İstəməyənin gözü kor olsun. Görünür, “Qarabağ” və “Neftçi”nin pley-off “sevdası” sizdən də yan keçməyib. Qurban Qurbanov və Böyakağa Hacıyevin uğurları almanda qıcıq yaradıb. Foqts da çox gözəl bilir ki, onun üçün real təhlükə elə Hacıyevlə Qurbanovdu. Çünki Bolqarıstanla oyunda arzuolunmaz nəticə “istefa”çıları yenidən dilə gətirəcək. Buna görə də o yerli məşqçilərdən zəif olmadığını sübut etmək istəyir, almanın iddiasını böyüyüb. Kaş ki faydasını görək.