“Simurq” AZAL-la oyuna hazırdı

Azərbaycan Premyer Liqasının II turunda 2014/15-ci il mövsümünə start verməyə hazırlaşan "Simurq" məşqləri tamamlayıb. Futbolxeber.az-ın klubun rəsmi saytına istinadən verdiyi məlumata görə, futbolçular dünən son hazırlıqları yerinə yetiriblər. Bir saata yaxın davam edən çalışmalarda məşqçilər korpusu yetirmələrini çox yormayıb. Yüngül isinmə hərəkətlərindən sonra üç qrupa bölünərək "kvadrat" və ikitərəfli oyun keçirilib. Sonda isə qapıya zərbələr və cinahlardan asmaların qapanması üzərində məşq edilib. Bundan sonra istirahətə çəkilən "sarı-qaralar", artıq qarşılaşmanın başlama vaxtını gözləyir.

Qeyd edək ki, "Simurq" - AZAL oyunu saat 19:00-da start götürəcək və "Simurq TV" vasitəsilə klubun rəsmi saytından canlı yayımlanacaq. Bu görüş rəqiblər arasında 22-ci duel olacaq. İndiyə qədər 5 görüşdə "təyyarəçilər"i məğlub etməyi bacaran Zaqatala təmsilçisi, 9 görüşdən bərabərliklə, 8 oyundan isə məğlubiyyətlə ayrılıb. Son matçlarda rəqibindən üstün olan Georgi Çixradzenin yetirmələri ardıcıl 7 oyundur ki, AZALa məğlub olmur. Ötən mövsümdə keçirilən son qarşılaşmadan isə Zaqatalada komandalar qolsuz bərabərliklə ayrılıb.