Meneceri açıqladı: “Ebesilio “Mordoviya”ya keçəcək”

“Syominin ardınca “Qəbələ”yə 3 futbolçu göndərdim”. Futbolxeber.az-ın məlumatına görə, bu sözləri Dmitri Selyuk deyib.

“Eurosport.ru”ya müsahibəsində FİFA meneceri həmin oyunçulardan birinin Lorenso Ebesilio olduğunu bildirib: “Lorenso Ebesilionu “Qəbələ”yə apardım. Sual yarana bilər ki, “Ayaks”ın heyətində Hollandiya çempionu olmuş futbolçunun “Qəbələ”də nə işi var? O, Azərbaycana ona görə getdi ki, orada Yuri Pavloviç Syomin var idi”.

“Ebesilio “Mordoviya”ya keçəcəkmi” sualını Selyuk belə cavablandırıb: “Məncə, hə. Onu da əlavə edim ki, mənimlə müqaviləsi olan hər bir futbolçu Rusiya klubuna üz tutarsa, aylıq qazancından 1000 dollar xeyriyyə fonduna köçürəcək. Ebesilio da “Mordoviya” ilə müqavilə imzalasa, bunu yerinə yetirəcək”.