Syomin “Qəbələ”ni “Spartak”a dəyişir?

“Qəbələ”nin baş məşqçisi Yuri Syomin iyunun 12-də Braziliyada keçiriləcək dünya çempionatında Rusiya millisinin oyunlarına canlı olaraq tamaşa edəcək. Futbolxeber.az-ın məlumatına görə, bu haqda təcrübəli mütəxəssis “Rossiyskaya qazeta”ya verdiyi müsahibədə deyib: “Bu ölkəni bir neçə dəfə ziyarət etmişəm. Bu dəfə də ora üz tutacağam. Artıq dostlarımla bərabər oteldə yer ayırmışıq, biletlərimiz də hazırdı. Rusiya millisini qrup mərhələsindəki oyunlarda dəstəkləyəcəyik. Sonrası isə orda müəyyənləşəcək”.

Qeyd edək ki, Rusiya millisi DÇ-2014-ün qrup mərhələsi çərçivəsində iyunun 17-si, 22-si və 26-da meydana çıxacaq. Həmin vaxt isə “Qəbələ” Avroliqaya hazırlaşmalıdır. Ölkə kubokunda qələbə qazanacağı halda, Qəbələ təmsilçisi Avroliqada mübarizəyə ikinci mərhələdən (17-24 iyul), finalda uduzacağı halda isə ilk təsnifat mərhələsindən (3-10 iyul) start verəcək.

Syomin həmin vaxtda Braziliyada olacaqsa, “Qəbələ”ni Avroliqaya kim hazırlaşdıracaq? Məhz bu məqama görə, Rusiya KİV-i Syominin “Qəbələ”ni “Spartak”a dəyişəcəyi haqda yayılan xəbərlərin əsassız olmadığını yazır.