Syomin: “Azərbaycan çempionatında ilk “üçlüy”ə daxil olmaq təkcə şərəfli yox, həm də çox çətindir”

“Qazandığımız bürünc medalı təkcə komandanın yox, həm də özümün şəxsi uğuru hesab edirəm. Azərbaycan çempionatında ilk “üçlüy”ə daxil olmaq təkcə şərəfli yox, həm də çox çətindir”. Futbolxeber.az-ın məlumatına görə, bu sözləri “Qəbələ”nin baş məşqçisi Yuri Syomin deyib.

“Sport-Ekspress”ə danışan təcrübəli mütəxəssis qazanılan uğurda klub rəhbərliyinin də rolunu qabardıb: “Son zamanlar güclü klublar səviyyəli legionerlərlə gücləniblər. Bu səbəbdən də medallar uğrunda amansız mübarizə gedirdi. Bizim ilk “üçlüy”ə faktiki olaraq yeni komandayla daxil olmağımız məni daha çox sevindirir. Bu uğrunda klub rəhbərliyinin böyük rolu var. Onlar çalışmaq, oyunlara hazırlaşmaq üçün ideal şərait yaradıblar. Mövsüm ərzində həm yaxşı, həm də pis günlərimiz oldu. Lakin komanda daxilindəki yüksək əhval-ruhiyyə yenidən inamlı çıxış edərək, mövsümü uğurla uekunlaşdırmağa, Avroliqaya vəsiqə qazanmağa imkan verdi. “Qəbələ” düzgün yoldadır. Bizi qarşıda mövsümün əsas oyunu gözləyir. Ölkə kubokunun finalında mayın 22-də “Neftçi” ilə qarşılaşacağıq”.