Şəhriyar Əliyev: “Avroliqaya yollanmaq üçün sona kimi mübarizə aparacağıq”

“Bakı”nın müdafiəçisi, ilk dəfə milli komandamıza dəvət alan Şəhriyar Əliyev Futbolxeber.az saytına müsahibə verib.

- İlk dəfə olaraq milliyə dəvət aldın. Hansı hisslər keçirirsən?

- Milliyə dəvət almaq çox sevindiricidir. İlk dəfə olacaq. Bu səbəbdən də əlimdən gələni edəcəm ki, gələcəkdə millinin əsas heyət üzvlərindən biri olum. 

- Bu dəvəti gözləyirdinmi?

- Bir gün dəvət gələcəyini gözləyirdim..

- Millidə sənin mövqeyində təcrübəli futbolçular oynayır. Onlarla rəqabət aparmaq çətin olmayacaq ki?

-Düzdü, müdafiədə təcrübəli oyunçular var. Ciddi rəqabət olacaq. Amma mən də çalışacağam ki, millinin əsas üzvlərindən biri olum.

- Debüt oyunun ABŞ-la matça təsadüf edə bilər. Bu məqam səni həyəcanlandırmır?

- Bəlkə də əsas millidə ilk dəfə oynayacağım üçün həyəcan ola bilər. Bununla belə, şans verilsə, əlimdən gələni edəcəyəm ki etimadı doğruldum.

- ABŞ kimi güclü komandayla səfər oyununda millimiz hansı nəticəyə ümid edə bilər?

- Yoldaşlıq görüşü olsa da, çətin oyun olacaq. İnşallah, çətin olsa da, yaxşı nəticə qazanarıq.

- Bir qədər də “Bakı” haqda danışaq. Son turda “Qarabağ”la qolsuz bərabərə qaldınız. Necə düşünürsən, "Bakı" həmin oyunda 1 xal qazandı, yoxsa 2 xal itirdi?

- Belə deyək də, həm 2 xal itirdik, həm də 1 xal qazandıq.

- Baş məşqçiniz Milinko Pantiç oyundan sonra "nəticədən çox razıyam" dedi. Belə çıxır ki, liderlə oyunda 1 xal “Bakı” üçün maksimum nəticədir?

- Yox, maksimum deməzdim. Sadəcə, zədəli oyunçularımız çoxdur. Belə məqamda liderdən 1 xal almaq yaxşı nəticədir.

- Pantiçin bir açıqlaması da geniş müzakirə olunur. Baş məşqçiniz “Bakı”nın avrokuboklara hazır olmadığını düşünbür. Komandanın üzvü kimi sən nə deyə bilərsən, həqiqətənmi “Bakı” bugünkü gündə Avroliqada oynamağa hazır deyil?

- Avropaya yollansaq, başqa cür olar. Komandamız yaxşı durumdadır.

- Növbəti turda “Qəbələ”ylə qarşılaşacaqsınız. Bu oyundan nə gözləyirsən?

- Çox çətin youn olacaq. Avroliqaya yollanmaq üçün şansımız qalır. Bu səbəbdən də sona kimi mübarizə aparacağıq. Yalnız qələbələ qazanmalıyıq.

- Sona 3 tur qalmış üçüncü pillədən 4, dördüncü yerdən 3 xal geri qalırsız. “Bakı”nın Avroliqaya yollanmaq şansı nə dərəcədə realdır?

- Çətindir. Amma çalışacağıq ki, sona kimi oynayaq, görək necə olur.

- Son zamanlar “Bakı”da ciddi maliyyə problemləri olduğu deyilir. Komandanın uğursuzluğunu məhz bu məqamla əlaqələndirmək olar?

- Belə deməzdim. Nəsə oyunumuzda problem var. Klubda ciddi problem yoxdur, yavaş-yavaş hər şey düzəlir.

- Məşqə oyun formasinda çıxmağınız da çox müzakirə olunur....

- Əsas odur ki, “Bakı”nın formasıdır.

- Təbii ki, orası elədi. Bəs, mətbuatda bu cür xəbələri oxumaq futbolçulara necə təsir edir?

- Çox şey deyilir, çox şey yazılır. Amma biz bunlara fikir vermirik. Ancaq başımızı aşağı salıb, öz işimizi görürük.

- Mövsüm artıq sona yaxınlaşır. “Bakı” ilə müqavilən nə zaman başa çatır?

- Hələ 1 illik müqaviləm var. Sözləşməm gələn yayda bitir.

- Deməli növbəti mövsümdə də “Bakı”nın uğurları üçün çalışacaqsan?

- Çox güman ki...

- Başqa klublardan təkliflər var?

- Mənə bu haqda bir şey deyən olmayıb. Hazırda “Bakı”nın üzvüyəm və məni başqa heç nə düşündürmür.