“Qəbələ” - “İnter” matçının ən yaxşısı Cavadov olub

İnStat Football şirkəti Premyer Liqanın 27-ci turu çərçivəsində keçirilən “Qəbələ” - “İnter” matçının statistik göstəricilərini təqdim edib. Futbolxeber.az-ın məlumatına görə, 90 ərzində “İnter” rəqibin qapısına 15 zərbə endirib, “Qəbələ” isə 10 zərbəylə fərqlənib. Bununla yanaşı, meydan sahibləri çərçivəyə 3 dəfə, qonaqlar isə 8 dəfə zərbə endiriblər.

Ötürmələrdə də üstünlük “İnter”in tərəfindədir. Belə ki, oyun ərzində komanda 431-i dəqiq olan 512 ötürməylə fərqlənib. “Qəbələ” isə 487 ötürmə edib və bunlardan 411-i dəqiq olub. Dəqiq ötürmələrin faizi hər iki komandada bərabər olub - 84 %.

Topa sahib olmaqda da “İnter” öndədir. 49 faizə qarşı 51 faiz. “İnter”in futbolçuları 134 mübarizənin 75 dəfə qalib gəliblər, “Qəbələ”nin oyunçularıysa cəmi 59 mübarizdən qalib ayrılıblar.

Kaxaber Tsxadadzenin yetirmələri oyun ərzində 71 hücumla fərqləniblər, ev sahibi komanda isə 103 hücum təşkil edib. “İnter” 32 hücumu cinahlardan təşkil edib. “Qəbələ” isə 41 hücuma cinahlardan keçib.

Oyun ərzində ən çox ötürmə edən futbolçu “İnter”in oyunçusu Derlis Meza Kolli olub. O, 70-i dəqiq olan 76 ötürmə ilə seçilib. "Qəbələ"nin heyətində ən çox ötürmə edən futbolçu isə Lorenso Ebesilio olub - 71 ötürmə, 56 dəqiq, lakin dəqiq ötürmələrə görə bu komandanın heyətində Dodo birinci olub - 60 dəqiq ötürmə.

Oyun ərzində qapını ən çox nişan alan oyunçular "Qəbələ" komandasının futbolçuları Lorenso Ebesilio və Viktor Mendi olublar - hərəyə 5 zərbə. "İnter"in heyətində isə Vaqif Cavadov 4 zərbə ilə seçilib.

İnStat Football şirkətinin hesabatına görə oyunun ən yaxşı futbolçusu “İnter”in kapitanı Vaqif Cavadov olub. Qeyd edək ki, Vaqif bu qarşılaşmada iki məhsuldar ötürmə ilə seçilib.