Ölkə futbolu

Azərbaycan Premyer Liqasının 26-cı turdan məqamlar

Şriftin ölçüsü:

18.03.2014 11:37

Azərbaycan Premyer Liqasının 26-cı turu bir sıra məqamlarla yadda qalıb.

300-cü qol

Azərbaycan Premyer Liqasında 2013/14 mövsümünün 300-cü qolu vurulub. “Rəvan”la ev oyununun 13-cü dəqiqəsində rəqib qapısına yol tapan “Simurq”un futbolçusu Rəşad Eyyubov 26-cı turun ilk, cari mövsümün 300-cü qolunun müəllifi olub.

26-cı turda vurulan qollar sayəsində bu rəqəm 310-a çatıb. Çempionatın baş tutan 130 oyununda orta məhsuldarlıq 2,38-ə bərabər olub. 310 qoldan 171-i meydan sahibləri, 139-u qonaqların hesabındadır. Qollardan 144-ü ilk, 166-sı ikinci hissədə vurulub.

Qeyd edək ki, mövsümün ilk qolunu avqustun 12-də “Qəbələ” ilə ev oyununda “Bakı”nın litvalı legioneri Mindauqas Kalonas vurmuşdu. 100-cü qol isə AZAL-ın oyunçusu Qərib İbrahimovun, 200-cü isə onun komanda yoldaşı Con Olureminin hesabındadır. Onlar müvafiq olaraq 9-cu turun “Simurq” və 18-ci turun “Neftçi” ilə qarşılaşmalarında fərqləniblər.

“İnter” 4 ildən sonra

Bakının “İnter” klubunun məğlubiyyətsiz oyunlar seriyasına son qoyulub. Azərbaycan Premyer Liqasının 26-cı turunda “Qarabağ”a məğlub olan Kaxaber Sxadadzenin yetirmələri 2014-cü ildə ilk dəfə xalsız qalıb.

Bakılılar sonuncu dəfə 86 gün əvvəl “Qarabağ”a 0:2 hesabı ilə uduzmuşdu. Ötən il dekabrın 20-də 18-ci turda səfərdə yenilən “İnter” öz meydanında daha ağır məğlubiyyət alıb – 0:3.

Sonuncu dəfə 2010/11 mövsümündə böyükhesabla uduzan paytaxt təmsilçisi 4 ildən sonra belə nəticəyə üzülüb. “İnter” 1247 gün əvvəl - 2010-cu il oktyabrın 16-da AZAL-la səfər oyununda 5 cavabsız qol buraxmışdı.

Böyükağa Hacıyev: 99-cu oyunda 50-ci qələbə

Azərbaycan Premyer Liqasının 26-cı turunun AZAL-la oyunu “Neftçi”nin baş məşqçisi Böyükağa Hacıyev üçün əlamətdar olub. Belə ki, “ağ-qaralar” 2:1 hesabı ilə qalib gəlməklə 56 yaşlı mütəxəssisin rəhbərliyi altında 50-ci uğurunu əldə edib.

2011/12 mövsümünün startında Çempionlar Liqasındakı uğursuzluqdan sonra Arif Əsədovu əvəzləyən və 2 il sonra eyni yarışdakı məğlubiyyətdən sonra postunu tərk edən Hacıyev bu ilin əvvəlində yenidən komandanın sükanı arxasına keçib.

Hacıyevli “Neftçi”nin 50-ci qələbəsi 99-cu matçına təsadüf edib. Azərbaycan kubokunun 1/4 final mərhələsinin “İnter”lə cavab oyunu təcrübəli mütəxəssisin “ağ-qaralar”ın baş məşqçisi kimi 100-cü matçı olacaq.

Mövsüm	Turnir	O	Q	H	M	T/F	X
2011/12	Premyer Liqa	32	20	3	9	55-30	63
2011/12	Azərbaycan kuboku	6	3	2	1	5-4	11
2012/13	Çempionlar Liqası	4	1	2	1	7-8	5
2012/13	Avropa Liqası (təsnifat)	2	1	1	0	4-2	4
2012/13	Avropa Liqası (əsas)	6	0	3	3	4-8	3
2012/13	Premyer Liqa	32	19	5	8	59-32	62
2012/13	Azərbaycan kuboku	6	3	3	0	10-3	12
2013/14	Çempionlar Liqası	2	0	1	1	0-1	1
2013/14	Premyer Liqa	8	3	2	3	12-14	11
2013/14	Azərbaycan kuboku	1	0	1	0	1-1	1
Cəmi:	Premyer Liqa	72	42	10	20	126-76	136
Cəmi:	Azərbaycan kuboku	13	6	6	1	16-8	24
Cəmi:	avrokubok	14	2	7	5	15-19	13
Ümumi:		99	50	23	26	157-103	173