“Bakı” hazırlıqlarını tamamladı

Sabah “Bakı” Azərbaycan Premyer Liqasının 24-cü turu çərçivəsində evdə “Sumqayıt”la qarşılaşacaq. Futbolxeber.az-ın klubun rəsmi saytına istinadən verdiyi məlumata görə, bu gün “zolaqlılar” təlim-məşq bazasının yardımçı meydanında oyunöncəsi son məşqini keçirib.

Saat 11:20-da başlayan hazırlığa yüngül qaçış və isinmə hərəkətləri ilə start verilib. Əyləncəli əltopu oynayan futbolçular ardınca məşqin çox hissəsini “kvadrat”a ayırıb. Qısa məsafələrə sürətli qaçış tapşırığını da icra edən komandamızın üzvləri sonda ikitərəfli oyun keçirib. Rəmzi olaraq “göylər” və “sarılar”ın mübarizəsi 2:2 hesabı ilə bitib.

Qeyd edək ki, dünənki məşqdə yenidən zədələnən Şəhriyar Əliyev hazırlıqda iştirak etməyib. Əksinə, müalicəsi yekunlaşan Cavid Hüseynov sıraya dönüb. Ayağında yüngül ağrılar olan Deyvidas Çesnauskis və Rauf Əliyev yüngül qaçış və dartınma hərəkətləri ilə kifayətlənib.