“Bakı” paytaxt derbisinə hazırdı

Sabah “Bakı” Azərbaycan Premyer Liqasının 23-cü turu çərçivəsində səfərdə “İnter”lə qarşılaşacaq. Futbolxeber.az-ın “Bakı”nın rəsmi saytına istinadən verdiyi məlumata görə, “zolaqlılar” bu gün oyunöncəsi son məşqini keçirib.

Saat 11:30-da başlayan hazırlığa yüngül qaçış və isinmə hərəkətləriylə start verilib. Ardından meydanın mərkəzinə cəmlənən “zolaqlılar” əyləncəli qaçdı-tutdu oynayıb. Daha sonra “kvadrat” və qısa məsafələrə sürətli qaçışa yer verilib. Çiskinli hava şəraitində davam edən məşqin sonunda ikitərəfli oyun keçirilib. Rəmzi olaraq “göylər” və “narıncılar”ın mübarizəsində ikincilər 6:5 hesabı ilə üstün olub.

Qeyd edək ki, hələ də zədəsini sağaldan Şəhriyar Əliyev kollektivdən ayrıca çalışıb. Zədəli olan Cavid Hüseynov və Elvin Əliyev isə hazırlıqda iştirak etməyib.