Oleq Dadaşov: “Almaniya millisini seçdiyinə görə oğlum Renatı dəstəkləyirəm”

“Hazırda hər iki oğlumun vəziyyəti yaxşıdır. Həm Rüfət, həm də Renatın karyerası istədiyi səviyyədə davam edir. Ata kimi bu məqam məni sevindirir”. Futbolxeber.az saytına müsahibəsində bu sözləri azərbaycanlı futbolçular - millimizin sabiq hücumçusu Rüfət və Almaniyanın U-17 yığmasının üzvü Renatın atası Oleq Dadaşov deyib.

O, Rüfətdən fərqli olaraq, Renatın Almaniya millisini seçməsinə belə münasibət bildirib: “Bu, onun qərardır. Mən Renatın bu addımını dəstəkləyirəm”.

Oleq Dadaşov qeyd edib ki, Renat daha əvvəl Azərbaycan yığmasını seçsə də, sonradan fikrini dəyişib: “Bəli, oğlum daha əvvəl Azərbaycan millisinə dəvət alıb. Amma sonradan Amaniya yığmasından da təklif gəldi. Orada Renat özünü yaxşı tərəfdən göstərə bildi. Buna görə də seçimini Almaniyann xeyrinə etdi”.

“Gələcəkdə oğlunuz fikrini dəyişə bilərmi” sualını ata Dadaşov belə cavablandırıb: “Gələcək barədə dəqiq söz deyə bilmərəm. Bunu zaman göstərəcək. Renatın gələcək karyerası onun Almaniyada işərinin necə getməsindən asılıdır”.

Sonda isə Oleq Dadaşov böyük oğlu Rüfətdən söz açıb: “Rüfət son zamanlar klubunda əsas heyətdə oynayır. Qollar vurur, oyun praktikasının yoxluğundan əziyyət çəkmir. Prosineçkinin oğluma dəvət göndərməməsinin səbəbini bilmirəm. Ümumi götürdükdə, onun səviyyəsi Azərbaycan millisində çıxış edənlərdən zəif deyil. Rüfət millidən kənarda qalmasına görə məyus olmur. Üzərində daha çox çalışır. Düşünür ki, özünü yaxşı tərəfdən göstərməyə davam edəcəyi halda, yenidən milliyə çağrılacaq. Şans qazanacağı halda, nəyə qadir olduğunu göstərəcək”. 

"Layihə AFFA yanında Media Komitəsi tərəfindən maliyyələşdirilir"